Muqdisho, Soomaaliya — 6 Oktoobar 2026: Kalfadhiga labaad ee EU–Somalia Business Forum 2026, oo ka socda Muqdisho, ayaa diiradda lagu saaray sidii loo xoojin lahaa maalgelinta iyo maalgashiga Soomaaliya, gaar ahaan maalgelinta mashaariicda horseedi karta koboc dhaqaale oo waara.

Doodda oo cinwaankeedu ahaa “Financing Somalia’s Growth: EU Investment Hub, Blended Finance, Guarantees and DFIs” ayaa isu keentay khubaro, wakiillo hay’adeed iyo daneeyayaal ka kala socda dhinacyada maalgashiga, horumarinta iyo ganacsiga gaarka loo leeyahay.

Kalfadhiga waxaa lagu falanqeeyay doorka EU Investment Hub, blended finance, dammaanadaha maaliyadeed iyo Development Finance Institutions (DFIs) ee lagu yareyn karo khataraha maalgashiga, laguna fududeyn karo helitaanka raasumaalka.

Ka qaybgalayaashu waxay sidoo kale ka hadleen muhiimadda ay leedahay in la abuuro hannaan maalgashi oo u sahlaya mashaariicda Soomaaliya inay helaan maalgelin, iyadoo la xoojinayo iskaashiga u dhexeeya dowladda, hay’adaha maaliyadeed, bahwadaagta horumarinta iyo ganacsiga gaarka loo leeyahay.

Madasha EU–Somalia Business Forum 2026, oo hal-ku-dhiggeedu yahay “Invest in Somalia: Unlocking High Potential Markets”, ayaa lagu soo bandhigay fursadaha maalgashi ee Soomaaliya iyo waddooyinka lagu kobcin karo ka qaybgalka maalgelinta gaarka loo leeyahay.

Doodaha madashan ayaa qayb ka ah dadaallada lagu dhisayo xiriir ganacsi iyo maalgashi oo dheeraad ah, isla markaana lagu taageerayo koboc dhaqaale oo ku saleysan fursadaha iyo awoodda suuqa Soomaaliya.

Business Connect News
Connecting Business, Investment & Opportunity.